شام سے پاکستانیوں کے انخلاء کیلئے تمام وسائل بروئے کار لائے جائیں، وزیر اعظم
شہباز شریف کی دمشق میں پاکستانی سفارتخانے کو معلوماتی ڈیسک اور ہیلپ لائن قائم کرنے کی بھی ہدایت
وزیراعظم شہباز شریف نے کہا ہے کہ شام میں مقیم پاکستانیوں کے جان و مال کی حفاظت حکومت کی اولین ترجیح ہے اور ان کے انخلاء کے لیے تمام وسائل بروئے کار لائے جائیں۔
پیر کے روز وزیراعظم شہباز شریف کی زیر صدارت خصوصی اجلاس ہوا جس میں شام کی موجودہ صورتحال کے پیش نظر پاکستانیوں کے محفوظ انخلاء کے لیے اقدامات پر غور کیا گیا۔
اجلاس کے دوران وزیراعظم نے ہدایت کی کہ شام سے وطن واپسی کے خواہشمند پاکستانیوں کے لیے ہمسایہ ممالک کے ذریعے محفوظ انخلاء کا لائحہ عمل فوری طور پر تشکیل دیا جائے جبکہ وزیراعظم نے دمشق میں پاکستانی سفارت خانے کو معلوماتی ڈیسک اور ہیلپ لائن قائم کرنے کی بھی ہدایت کی تاکہ شہریوں سے بروقت رابطہ کیا جا سکے۔
شہباز شریف کا کہنا تھا کہ امن و امان کی صورتحال بہتر ہونے تک دفتر خارجہ کا کرائسس مینجمنٹ یونٹ اور پاکستانی سفارت خانوں میں معلوماتی ڈیسک چوبیس گھنٹے فعال رہیں۔
اجلاس میں نائب وزیراعظم اسحاق ڈار، وزیر دفاع خواجہ محمد آصف، وزیر برائے اقتصادی امور احد چیمہ، وزیر اطلاعات و نشریات عطا اللہ تارڑ، معاون خصوصی طارق فاطمی اور متعلقہ اداروں کے اعلیٰ افسران نے شرکت کی۔
